rum

Rum, m. Est le traict en ligne droicte d'un vent à autre, comme Nort, Sud, Est, West, Nordest, SudWest. Ce qui est entendu non seulement d'un vent entier à autre, ains aussi d'un demi vent à autre, et d'une quarte de vent à autre, et de plus grande menuise de vents, s'il s'en faisoit en la navigation. Selon ce on dit Arrumer une carte, c'est à dire tirer en icelle lesdits Rums, de vents entiers, demi vents ou quartes d'iceux, d'un poinct à son opposite en droicte ligne. Ce qui est usité és cartes de navigation ou de mer, parce que les routes et chemins de la mer sont en haut et en l'air, et non en bas comme ceux de la terre, c'est à dire aux vents, Lesquels rums sont marquez de noir, de rouge et de vert, pour distinguer les rums des vents entiers d'avec ceux des demis vents et des quartes, servans trestous pour tenir droicte route, et la reprendre quand la fureur d'un vent traversain a fait desrouter et fourvoyer le navire. Et s'il se trouve des cartes de terre Arrumées, à la façon de celles de mer, comme en l'an mil cinq cens soixante quatre, Il m'en fut monstré une de ce royaume, toute arrumée, faicte par un Cosmographe Portugais, à la requeste de l'Ambassadeur du Roy de Castille, que j'envoyay avec ledit Cosmographe au Roy Charles IX. estant lors à Escouen, à ce qu'il retinst laditte carte comme pernicieuse à son Estat, et le pourtrayeur et Cosmographe à son service ce qu'il feit, sont cartes pour la guerre, servans à un estranger ennemi pour sans guide cognoissant le païs, et à la faveur d'un quadran ou bussole mener une armée à travers tout le païs desseigné en ladicte carte arrumée, et ne tomber point au danger, auquel T. Live escrit en son 22. livre estre tombé Annibal quand il se vit rendu au champ stellates, Le mot peut estre prins de {{t=g}}rhumos,{{/t}} diction Grecque, qui signifie le timon d'une charrette, qui la fait aller droit sans balancer: Car le Rum monstre aussi le droit de la route qu'il faut tenir sans varier. Aucuns l'appellent rym, autres lys de vent. L'Espagnol Rumo. conformément au mot Grec {{t=g}}rhumos,{{/t}} excepté en l'accent.

Thresor de la langue françoyse. Jean Nicot.